Chapter 1

Now e cor be as things dey be, the children of Israel cor dey form boss for where God dey, corruption upandan, evil left and right and the matter cor pain God sorte he can arrange them like surprise pack give philistines.

Now this arrangement cor dey for like 40years sorte, we can spot one man from zorah, na e be the papa of the actor of our story today.
Now this man of zorah way land with e family name way be say na Danites, he name nah manoah. U go pronounce almost like manure self.

Now e cor be like Abraham way e be say e mama never cor do omugwo for e wife body, this kai matter for our side na auto-second wife for end las las or side chick baby mama.

But God cor reason e matter, send one of e angel make e wayley and hijack e wife for road tell am say

"baby girl, we Don hear your broadcast say you never breastfeed baby once for your life but make you calm down because las las you go get pikin

But you go agree to some terms and conditions for this heavenly jumia package way you wan receive way go be say as soon as you get the pikin, abeg I take God beg you nor go form boss cor dey eat anyhow, see suya chop an, see monkey swallow am, no nor do anything like that and secondly nor go do say your husband talk to you anyhow you cor say na drink you wan go drink or say your husband dey flex guiness or Chelsea or alomo you too cor say you self go challenge am, I take God beg you nor do so at all because this pikin way you wan born nor be China made but na express package straight from papa God and e na go resemble Bob marley nor be naira marley, and e marlians for head dey nor go touch, razor nor go see am, cutlass nor go cut am, bottle nor go shave am, scissors nor go smell am because this pikin nor be doctor or politician e wan cor life cor do but na nazarite for God e go get as e CV before e finish e packaging for life ".



To be continued.

Samson retold.

6-23


Continued.

Now you know women mata as e dey be na the Woman cor go block her husband for house say see oh see as one man of God take message me oh but this man e nor gree mention e name or where e for dey come from maybe e nor want make you go track am with boys for area.

Oh boy the mata cor get as e take hold the man say hah for this Israel say e miss that kai thing.
He cor tell me say special baby package dey wait me but make I flex alcohol and make I nor chop anyhow food say na like fried rice and chicken on a daily I go dey flex.

Manoah cor go beg God say "God you see the kai wahala way I dey so, this pikin na e go be say na extremely extraordinary special pikin e go be, at least you suppose let us know or give us manual way we go take take they order e life or at least cor hold conference abhi na seminar to teach us e mata make we nor go Bleep up like our politicians dem"

God cor reason again by now that angel suffer for the message if na like here na, na to send am message for Facebook finish but the angel take the contract again, e cor agree go but this time e cor make sure daddy Manoah dey around as a sharp guy make dem no tell am say make e cor third time.

As soon as the woman sight am dey approach, omon she turn Usain bolt go collect her husband make e answer present for the angel front.
Manoah land see the man left and right, upandan e cor still dey ask again.
"bros abeg nor vex na u be the guy way wayley my wife the other day yarn matas give am?"

The man reply.
"bros nor be toast I cor toast na messages from God I cor give am so make you relax abeg".

Manoah cor start e objectives and theory questions for the man body e cor dey ask say as you cor tell us say pikin dey Road dey come na abeg na which levels we go take dey order or package e mata?

The man of God confuse na e reply an sharp sharp.
"but bros, I don tell your wife the levels na say make she nor drink as you dey drink and make she nor eat watin nor dey good for where God dey abhi na 2021 budget you wan plan for the baby?"

Manoah cor still continue but e go be say the Manoah get issues before maybe e Don first be teacher for one primary school way dem nor dey pay am well, e cor reply am again.
" okay bros nor vex but abeg eh you fit just dey with us small because this news way u talk so na big news so you fit just dey with us make we arrange you small flexing, ishiewu and beer levels to take arrange your self"

The angel nor gree say "see chairman werda der you chain me put here na till una born this pikin my mouth nor go touch any food but if e be say you want thank me put abeg thank God instead, find the ishiewu target make you go kill am take tell papa God thank you oh"

Now as e dey be na oga Manoah never still think say person way reject free food first of all nor be African man say na e either angel or white man but say e na professor of questions e continue say e wan know the name say wen the pikin don arrive we go atleast say "edopkolor abhi na obafemi na e talk way e cor to pass"

But the angel resist am again.

Na there Manoah for give up e agenda for the 2020 cor say las las make e go kill goat as the angel take talk.

So e cor find one small one like that way never mature for adult , the one way de dey call kid goat levels as a sharp man cor go offer the level but omon cor see as the angel cor elevate for the matter.

Sorte the angel nor trek back again but rather cor enter elevator direct back to heaven for there.

But the angel cor Bleep up there because kasala cor burst when Manoah eye open say this man na fly e just fly so.
As e confirm am say nor be wizard abhi na superman e go be say na God and as e be like that na death e sure for us like 2.2 odds clear.

Hmmh shey we Don dey see who samson inherit some unmanly characters from so?
Manoah cor dey fear like say na e wan get the belle the woman cor tell an say if God wan exit us why bother to dey tell us all this things because dead body no fit dey pregnant las las Manoah cor form man agree say e wife na man pass him for the matter.

Continued.


Now true true e cor be say the woman cor born oh and e papa cor call am samson and as the pikin dey grow God cor dey bless am.

And now so the spirit of God cor dey GPS track e location upandan dey move am go camp of Dan way settle between zorah and eshtaol if you like yourself nor bother try pronounce the last city me almost cut tongue put.


THE END OF CHAPTER ONE.


if e be say you dey enjoy the story, audios too self dey and the remaining for little money way u go enjoy.

But chapter two for here na next Sunday e go happen.

Una happy Sunday.